ఆ కలలు ఉదయాన్ని చూడనప్పుడే

నీ పరిచయం కానంతవరకు కలలున్నా అందులో దేవత లేదు,

నీవే నా ప్రేమని తెలిసాక కలలదేవతగా మారావు,

మరిచే తరుణం అంటూ ఉంటే అది ఆ కలలు ఉదయాన్ని చూడనప్పుడే....

❤️

పుట్టినరోజు శుభాకాంక్షలు

ఎదురుపడి నీ ప్రేమను పొందలేను,

మనసుపడినా మనసువిప్పి మాట్లాడలేను,

కానీ నీ క్షేమం కోరే ఒక్కమాట,

చిరునవ్వును తెప్పించే ఒక్కమాట చెప్పగలను,

పుట్టినరోజు శుభాకాంక్షలు ... :)

 (ఒక్కరోజు ఆలస్యంగా)

ప్రేమజువ్వ

ప్రతి ఉదయం అంత వెలుగు ఎదురుపడుతున్నా,

చీకటిలో వెలిగి ఆరిపోయే తారాజువ్వలోని ఆనందం వేరు,

మది నింపిన ఆత్మీయుల  ప్రేమ ఎంతున్నా,

ఒక్క క్షణమైనా నీ ప్రేమ తాకిపోతే కలిగే హాయి వేరు...

నిన్ను కాక ఎవరిని తేగలను

నీ అందం గుర్తుకొస్తే జాబిలి వంక చూస్తా,

నీ చిలిపితనం గుర్తుకొస్తే ఊసులు చెప్పే చిరుగాలితో స్నేహం చేస్తా,

కానీ నిన్ను అందాలి అంటే,

 నిన్ను కాక ఎవరిని తేగలను?

ఏ బొమ్మకు ప్రాణం పోస్తే అది నీలా మారగలదు?

మారాలి

ఆవగింజ అందం తెలియాలంటే మరో ఆవగింజలా ఆలోచించాలి,

గుమ్మడికాయ మనసు గెలవాలంటే మరో గుమ్మడికాయలా మారాలి,

పువ్వు ప్రేమ గెలవాలంటే తన సువాసనలు చూడగల ముక్కులా ఉండాలి....

నా కళ్ళు నా మనసును వెక్కిరిస్తోంది

ఆగలేని అందం పువ్వు దాటితే,

దాగలేని తీపి తేనె పట్టు దాటితే,

ఉండలేక ముత్యం కడలి దాటితే,

బొమ్మ లోని సొగసు ప్రాణం పోసుకుంటే,

ఈ అద్భుతాలన్ని నీలో నేను చూస్తూ ఉంటే,

నీ అందం నా ప్రేమను చిన్నబుచ్చుతోంది,

నా కళ్ళు నా మనసును వెక్కిరిస్తోంది....

కర్మ

నీకు నువ్వు చేసుకునేదే కర్మ.

వందశాతం

త్యాగం లేనిదే ఏదైనా వందశాతం పూర్తికాదు...

నువ్వు నా మదిని తాకిన మకారందానివే

మంచు తునక ఆహ్లాదం, 

ఇప్పుడు నీటి బిందువై మెరుస్తోంది, 

పత్తి గుత్తిలా మెత్తని ముద్ద మందారం, 

సన్నజాజిలా అందాలు అద్దుకుంటోంది, 

వెలుగంత రూపం కౌగిలిస్తే వెచ్చగా, 

ఇప్పుడు అంత వెలుగు ఒక కిరణంలో ఇమిడిపోతోంది, 

కనిపించే పగటి నీడ, 

ఇప్పుడు సంధ్య వేళ నీడలా కనీ కనిపించక కవ్విస్తోంది, 

ఎంత ఆనందమో నీలో కానీ అదే అందం, 

ఎంత సొగసో నీలో పురివిప్పుకుంటోంది లేలేత భావం, 

నీ నవ్వుకు అభిమానులు, 

ఇప్పుడు ఆ నవ్వుకు తోడు నయగారాలు, 

అప్పుడు ఒక అందం ఇప్పుడు మరొక అందం, 

అంతే కాని ఎప్పుడు నువ్వు నా మదిని తాకిన మకారందానివే...

స్నేహం ఓడిపోదు

ఎన్ని చినుకులు ధారపోసినా నేల నింగినంటదు,

ఎంత ఆవిరిని కానుకిచ్చినా,

నింగి నేల చేరదు,

దూరం తొలగకున్నా,

వాటి స్నేహం ఓడిపోదు,

పలుకులే కానుకలై ఒకరికొకరం ఇచ్చుకుంటే,

పరవశించే ప్రకృతే మన చెలిమి కూడా!

నా ఇష్టం నువ్వేనని తెలుసా?

ఒక నాటి కల నిజమైనా,

ఈ నాటి నిజం దూరం అవుతుంటే,

ఆ నాటి పట్టలేని సంతోషం ఎంతో,

ఈనాడు ఆపలేని దుఃఖం అంతే,

నీ ఇష్టం అంటూ వదిలేసినా,

నా ఇష్టం నువ్వేనని తెలుసా?